Glatt var á hjalla í hrekkjavökupartýi ársins á Ölveri um síðastliðna helgi. Margt var um manninn og mikið af kunnugum andlitum á bak við frábærlega hönnuð dulargervi. 

Gríðarleg stemning var í húsinu en Salka Sól og Selma Björns tóku lagið og hljómsveitirnar Úlfur Úlfur og Amabadama stigu einnig á svið. 

Dulúðug stemning var í loftinu og alls konar furðuverur á sveimi. Þar var þó hægt að finna Selmu Björns og Tuma sem voru nær óþekkjanleg í frábærum búningum. Leikaraparið Gísli Örn og Nína Dögg voru sæt að vanda.

Ágúst Bent og Matta voru örugglega þau einu sem hefðu getað spornað gegn kröftum uppvakninganna en þau mættu augljóslega beint úr kirkjunni í partýið. 

Vinahópur sem samanstendur af þeim Sölku Sól og Arnari Frey, Helga Sæmundi og Kolfinnu, og Selmu Björns fannst vanta alvöru fullorðins metnaðarfullt hrekkjavökupartý. Planið er að endurtaka leikinn að ári og gera partýið þá jafnvel enn stærra.