Lokaverkefnið varð að skáldsögu og svo var fagnað

Birgitta Björg Guðmarsdóttir rithöfundur fagnaði útkomu bókar sinnar, Moldin heit, í verslun Pennans Eymundsson á Skólavörðustíg. Um er að ræða aðra bók Birgittu Bjargar en Skotheld kom út 2018.

Vel var mætt í boðið en á meðal gesta var Fríða Ísberg, Kormákur Logi Bergsson, Úlfar Þormóðsson og Melkorka Magnúsdóttir svo einhverjir séu nefndir. 

Lokaverkefni varð að skáldsögu

Moldin heit var upphaflega skrifuð sem lokaverkefni í ritlist á meistarastigi og var Bergþóra Snæbjörnsdóttir leiðbeinandi Birgittu Bjargar. Bókin fjallar um ástina en hún segir frá því þegar ástin í lífi Karenar deyr. Hún mætir í jarðarförina óboðin og sest aftast. Þegar búið er að jarða eina fortíð bankar önnur upp á. 

„Moldin heit eftir Birgittu Björgu Guðmarsdóttur er forvitnileg og vel skrifuð skáldsaga um listsköpun, sorg og missi. Með ljóðrænum stíl eru dregnar upp sterkar og áhrifaríkar myndir um leið og leikið er skemmtilega með form textans þannig að hann minnir einum þræði á dans – eina af þeim listgreinum sem eru í brennidepli sögunnar. Á áreynslulausan hátt flakkar frásögnin fram og aftur í tíma þannig að lesendur kynnast aðalpersónum verksins mæta vel og fá aukinn skilning á flóknum samskiptum þeirra við aðra,“ segir í umsögn dómnefndar nýræktarstyrks miðstöðvar íslenskra bókmennta.