Förðunarfræðingurinn Harpa Káradóttir sýndi fallega hátíðaförðun í Apotek Atelier á föstudaginn var í samvinnu við íslenska tískumerkið Sif Benedicta. Verslunin Apotek Atelier selur íslenska hönnun frá Sif Benedicta, sem er í eigu Halldóru Sif Guðlaugsdóttur, og líka hönnun Sævars Markúsar sem hannar undir sama nafni. 

Vel var mætt enda vilja fleiri en færri læra af Hörpu Kára sem er einn af færustu förðunarfræðingum landsins. Harpa farðaði Önnu Braunu með glitrandi augnskugga og setti á hana fjólurauðar varir. 

Halldóra Sif Guðlaugsdóttir, tískuhönnuður hjá fatamerki sínu Sif Benedicta, hefur vakið athygli fyrir bleikar dragtir, silkiskyrtur og kjóla. Hafa margar þekktar konur látið sjá sig í hönnun hennar og má þar nefna Guðrúnu Karls Helgudóttur, biskup Íslands, en hún var einmitt stödd í boðinu á föstudaginn. Halldóra Sif er mikil sparifatakona og segir að fólk eigi að nýta hvert tækifæri til að klæða sig upp á. 

„Yfir hátíðirnar þá finnst mér alltaf gaman að dressa mig upp til þess að lífga upp á skammdegið annaðhvort í fallegri dragt og silkiskyrtu eða fallegum silkikjól. Ég vil vera í góðum pels yfir svo mér verði ekki kalt og í þægilegum skóm. Rauður varalitur er alltaf með í töskunni,“ segir Halldóra Sif sem skartaði sínu fegursta á þessum viðburði.