Skilnaður þarf ekki að vera dauðadómur enda margir sem hitta sálufélaga sinn eftir skilnað og erfið sambandsslit. Meghan hertogaynja hitti draumaprinsinn sinn, Harry, eftir að hún skildi við fyrrverandi eiginmann sinn og það sama má segja um fleiri stjörnur eins og kemur fram á vef Prevention.
Nicole Kidman
Leikkonan var gift leikaranum Tom Cruise í rúm tíu ár og ættleiddi með honum tvö börn. Þau skildu árið 2001 og árið 2006 gekk hún í hjónaband í annað sinn þegar hún og tónlistarmaðurinn Keith Urban giftu sig. Þau eiga saman tvær dætur og eiga erfitt með að fela ást sína á rauða dreglinum.
Reese Witherspoon
Leikkonan gekk í hjónaband með leikaranum Ryan Phillippe árið 1999 og eignaðist með honum tvö börn. Hjónabandinu lauk árið 2006 en nokkrum árum seinna fann hún ástina í lífi sínu, Jim Toth. Witherspoon og Toth giftu sig árið 2010 og eignuðust saman barn árið 2012.
Chris Pratt
Leikarinn og fyrrverandi eiginkona hans, Anna Faris, tilkynntu skilnað sinn árið 2017. Pratt var ekki lengi að finna ástina og gekk í hjónaband með Katherine Schwarzenegger, dóttur Arnolds Schwarzeneggers, fyrir stuttu.
Will Smith
Leikarinn var giftur Sheree Zampino í þrjú ár á tíunda áratugnum og á með henni son. Árið 1997 gekk hann í hjónaband með Jödu Pinkett Smith og eru þau enn saman.
Kim Kardashian
Raunveruleikastjarnan var gift körfuboltamanninn Kris Humphries í 72 daga. Hún fann loksins ástina þegar hún byrjaði með Kanye West. Hjónin eiga nú fjögur börn og hafa verið gift í fimm ár.
George Clooney
Margir héldu að Clooney myndi aldrei festa ráð sitt eftir að hann skildi við Taliu Balsam árið 1993. Clooney fann loksins réttu konuna þegar hann kynntist Amal Clooney. Þau giftu sig fyrir fimm árum og eignuðust tvíbura árið 2017.
Miranda Kerr
Fyrirsætan og leikarinn Orlando Bloom skildu árið 2013 eftir þriggja ára hjónaband og eitt barn. Nú er fyrirsætan gift Snapchat-stofnandanum Evan Spigel og eiga hjónin von á sínu öðru barni saman.
Ashton Kutcher
Leikarinn gekk í hjónaband með leikkonunni Demi Moore árið 2005 þrátt fyrir 16 ára aldursmun. Hjónabandið entist þó aðeins í sex ár. Nokkrum árum seinna gekk Kutcher í hjónaband með gömlum samstarfsfélaga, Milu Kunis. Saman eiga þau tvö börn.
Ryan Reynolds
Leikarinn giftist Scarlett Johansson árið 2008 en þau tilkynntu skilnað tveimur árum seinna. Í dag er hann giftur Gossip Girl-stjörnunni Blake Lively og eiga þau von á þriðja barninu.