Erótísk hlaðvörp slá í gegn

Vinsældir erótískra hlaðvarpsþátta hafa stóraukist í kórónuveirufaraldrinum. „Svo virðist sem fólk sé eilítið dónalegra í samkomubanni og vinsældir hlaðvarpsþátta sem fjalla um kynlíf hafa náð nýjum hæðum,“ segir blaðamaður The Times. 

„Hlustendur hafa meiri tíma og eru ef til vill einhleypir eða fjarri mökum sínum á tímum þegar lagst er gegn því að fólk komi saman. Þá leitar fólk í auknum mæli eftir einhvers konar örvun sem kemur í stað líkamlegrar nándar.“

Tímarit Opruh Winfrey hefur sett saman lista yfir 19 bestu erótísku hlaðvarpsþættina og þar kennir ýmissa grasa. Nefna má þætti Demi Moore, Dirty Diana, sem hafa vakið mikla athygli. „Þetta er áminning um að það að hlusta á kynlífssögur getur verið mun meira æsandi en að horfa á kynlíf. Ímyndunaraflið fer á flug og þú býrð til eigin veröld með fólkinu sem þér líst best á. Með heyrnatólin á þarf enginn að vita hvað þú ert að hlusta á.“

Þá hafa þættirnir Bawdy Storytelling undir stjórn Dixie De La Tour einnig náð miklum vinsældum. Þar er fólk hvatt til þess að segja frá sínum villtustu kynlífsreynslum. 

• Blogga um frétt