Íslensk ofurstjarna í Indlandi

Hin hálfíslenska Angela Jonsson er rísandi stjarna í Indlandi þar sem hún ólst upp, orðin landsþekkt fyrirsæta og landaði nýlega aðalhlutverki í stórri kvikmynd þar í landi. Fyrir um ári bar hún sigur úr býtum í indverskum raunveruleikaþætti.

„Ég er í aðalkvenhlutverki í kvikmyndinni en einn stærsti kvikmyndaframleiðandi hér í landi, Saijd Nadiadwalla, framleiðir myndina. Ég get ekki tjáð mig mikið nánar um einstök atriði en þó er staðfest að ein aðalstjarna Bollywoodkvikmyndanna hér í landi, Salman Khan, leikur einnig í myndinni,“ segir Angela þegar Smartland náði af henni tali.

Faðir Angelu er íslenskur, Vilhjálmur Jónsson, en hann fluttist til Indlands fyrir þrjátíu árum og kynntist þar Söndru Tamar, móður Angelu. Angela ólst upp í fjallaþorpi í Suður-Indlandi í 11 systkina hópi. Foreldrar hennar hafa helgað krafta sína mannúðarstörfum, unnið til að mynda með heyrnarlausu ungu fólki.

„Ég hef verið mjög upptekin síðasta árið. Hef setið fyrir í auglýsingaherferðum, verið á forsíðum allra helstu tímarita Indlands en núna fer öll mín orka í komandi kvikmynd. Ég er að læra hindúamálið og æfi indverska dansa dag hvern fyrir hlutverkið. Tökur hefjast innan nokkurra mánaða,“ segir Angela. Þótt hún hafi aldrei búið á Íslandi á hún ættingja hér á landi sem hún heldur góðu sambandi við og heimsækir reglulega.