Árshátíðin verður ekki rifjuð upp fyrr en 2038

Árshátíð borgarstjórnar var haldin hátíðleg í Höfða á laugardaginn. Mikið stuð var á árshátíðinni og var hápunkturinn án efa þegar söngvarinn Gylfi Ægisson mætti en hann var leyninúmer. „Það er óskrifuð regla að þetta sé þraslaus árshátíð,“ segir Dagur B. Eggertsson og bætir við: „Það er mjög ljúft og skemmtilegt að byrja árið á því að hittast. Gylfi var leyninúmer á árshátíðinni og tók hann þrjú lög, þar með talið lagið Stolt siglir fleygið mitt, sem er táknrænt fyrir ferð landsins út úr kreppunni. Undirtektirnar voru góðar enda er Gylfi einlægur.“

Þegar Dagur var beðinn um að segja sögur af árshátíðinni sagði hann að það væri 25 ára reglan sem gilti um samkomur sem þessa. Þessi árshátíð yrði ekki rifjuð upp fyrr en 2038. „Þú getur prófað að hafa samband þá,“ sagði hann og hló.

Það var því ekkert annað í stöðunni en að spyrja hann um áramótaheitin og hvort hann hefði strengt einhver slík. „Nei, ég hef ekkert sérstaklega góða reynslu af því vegna þess að ef maður strengir þess heit að losa sig við kíló er maður líklegri til að fjölga þeim. Maður þarf að laumast meira að hreysti og lífsstílsbreytingum. Annars verður fallið svo hátt.“

Það er hefð fyrir því erlendis að fólk taki hvítan janúar (hætti að drekka áfengi í þessum mánuði). Þegar Dagur er spurður hvort það sé á döfinni þá segir hann svo ekki vera. „En ég dáist mjög að fólki sem gerir það og er mjög hvetjandi og fullur aðdáunar.“

Mælir þú með einhverju sérstöku ráði til að ná af sér jólasteikinni svona í byrjun janúar? „Ég held að það skipti mestu máli að eiga ávexti og borða þá á milli mála. Úr þeim færðu bæði frískleika og heilmikið vatn. Og það er gott að borða oft, en ég á ekkert með að gefa öðrum góð ráð því sjálfur drekk ég kaffi á fastandi maga og drekk heilmikið af því,“ segir hann og hlær.

Borðar þú ekki morgunmat? „Jú, yfirleitt borða ég morgunmat til að tryggja að krakkarnir geri það og ef vel til tekst þá er það gott fyrir fjölskylduna að fá sameiginlegt upphaf að góðum degi.“

• Blogga um frétt