Þetta lærði Bryndís af sambandinu við Fjölni

Leikkonan og söngkonan Bryndís Ásmundsdóttir prýðir nýjasta hefti MAN. Bryndís er nýskilin við Fjölni Þorgeirsson en sambandið stóð yfir í þrjú ár. Stuttu eftir að þau kynntust varð Bryndís barnshafandi. Meðgangan gekk ekki áfallalaust fyrir sig og fékk Bryndís blóðtappa og var hún hætt komin. Í framhaldi af því var hún greind með alvarlegt þunglyndi og lögð inn á geðdeild en útskrifaði sig sjálf samdægurs.

„Það tók lækninn ekki nema 17 mínútur að greina mig þunglynda og segja mér að rölta af kvennadeildinni yfir á geðdeildina. Þetta var undarleg framkoma þegar mér var gert að labba yfir á geðdeildina, með blómvendi í fanginu og engum datt í hug að fylgja mér. Það sem tók við þar var ekki aðlaðandi og var ég fljót að biðja um að fá að fara heim. Síðar hefur læknirinn beðist afsökunar á þessari framkomu en hún var undir vinnuálagi á þessum tíma. Ég var þó vissulega þunglynd og fékk alvarleg kvíðaköst,“ segir Bryndís.

Bryndís og Fjölnir skildu á dögunum og aðspurð hvaða lærdóm hún hefur tekið með sér eftir sambandsslitin verður Bryndís hugsi: „Út úr sambandinu fékk ég auðvitað heilmikla reynslu og yndislegan son sem ég ætla að passa vel upp á en auðvitað einnig mikla eftirsjá. Helsti lærdómurinn sem ég dreg af því er þó kannski að verða ekki alltaf svona yfirmáta ástfangin í hvert sinn sem einhver er góður við mig. Ég er alltaf flutt inn um leið og einhver lætur mér líða vel og fær mig til að hlæja,“ segir hún.

Bryndís Ásmundsdóttir er glæsileg á forsíðunni.

• Blogga um frétt