Smartland Mörtu Maríu | Frægð | mbl | 30.10.2014 | 17:00

„Þetta eru mikil vonbrigði“

Katrín Ásmundsdóttir og Anna Tara Andrésdóttir eru áhugakonur um kynjafræði og kynlíf. mbl.is/Árni Sæberg

Öllum verktökum á útvarpsstöðinni X977 hefur verið sagt upp störfum. Þar á meðal Önnu Töru Andrésdóttur og Katrínu Ásmundsdóttur sem voru með þáttinn Kynlega kvisti á laugardögum.

„Vonbrigðin eru að sjálfsögðu mikil, næstu þáttaefni ákveðin og svona en við erum að íhuga framhaldið og sjá hvernig hægt er að snúa sér í þessu,“ segir Anna Tara.

Þegar hún er spurð að því hver séu næstu skref segist hún vera að reyna að átta sig á því sjálf.

„Það væri gaman að halda Kynlegum kvistum áfram, vinna scetchþætti með Hljómsveit, vera með fræðslu í skólum og félagamiðstöðum. Það er eflaust mikil þörf þar á. Ég efast allavega ekki um að heimurinn hefði gott af Kynlegum kvistum,“ segir hún og játar að hún sé opin fyrir öllum hugmyndum og auðvitað atvinnutilboðum.

„Það sem einkenndi þættina var að sjá hversu langt femínismi kæmist í samvinnu fremur en að stilla kynjunum upp sem stríðandi fylkingum, að þora að fjalla um afar viðkvæm málefni og svo þetta hispurleysi sem fólk talar um en er meira sjálfsagður hlutur fyrir mér, en fyrst og fremst var lögð mikil hugsun í þættina sem var keyrð áfram af mikilli ástríðu sem stoppar ekki hér.

Aðspurð að því hvort hlustunin hafi verið lítil segir hún svo ekki vera. En hverjar eru Anna Tara og Katrín?

Í viðtali við Sunnudagsmoggann í sumar sögðu þær frá því að þær væru góðar vinkonur og bræðradætur. Anna Tara hefur þegar lokið BS gráðu í sálfræði og lauk diplomagráðu í kynjafræði nú í sumar. Katrín lauk menntaskóla fyrir tveimur árum og stundar lögfræðinám. Ekki er þó allt upp talið, því Anna Tara syngur með tveimur hljómsveitum, Reykjavíkurdætrum og hljómsveitinni Hljómsveitt.

„Okkur liggur hvað mest á hjarta í þessum málaflokki, þannig að þetta var í rauninni það sem okkur þótti auðveldast að fjalla um og lá beinast við,“ segir Anna. Katrín kinkar kolli og bætir við: „Fyrir mér eru þetta oft málefni sem ég veit ekki allt um en langar að vita meira um. Og ég get ekki verið ein um það. Þetta eru hlutir sem nauðsynlegt er að ræða og gefa gaum,“ segir Katrín í Sunnudagsmogganum.

Frænkurnar hafa rætt við ýmsa og má þar nefna Erp, sem spjallaði við þær um endaþarmsmök karla og Siggu Dögg, kynfræðing. „Um daginn töluðum við síðan við tvær stelpur sem sögðu okkur frá „slutshaming“, þær Björk Brynjars og Eydís Blöndal, en „slutshaming“ getur verið ýmiss konar. Björk og Eydís nefndu til dæmis að margar stúlkur og konur upplifa djúpa og jafnvel áralanga skömm eftir að þær fróa sér í fyrsta sinn.“