Erna Hrönn hætt eftir fimm ára starf

Söngkonan Erna Hrönn er hætt á útvarpssviði 365 eftir fimm ára starf. Landsmenn þekkja Ernu Hrönn vel úr sviðsljósinu því hún hefur starfað sem söngkona í fjölmörg ár og margoft tekið þátt í Söngvakeppni Sjónvarpsins. Auk þess hefur hún oft farið út í heim fyrir Íslands hönd sem bakrödd í Eurovisjón.

„Ég hef komið víða við á þessum fimm árum en fjörið byrjaði í rauninni þegar Brynjar Már plataði mig til að lesa sjóðandi heit FM-stef sem hljómuðu svo í nokkur ár. Síðdegisþátturinn Fjögur-sex á FM957 var fyrsta dagskrárgerðin sem mér bauðst að taka þátt í á útvarpssviðinu og var það með Brynjari Má en við færðum okkur svo yfir í Morgunþáttinn Magasín á sömu stöð og við bættist Þórhallur Þórhallssonog seinna nafna mín Erna Dís Schweitz Eriksdóttir. Ég fékk líka aðeins að sýna mig á Stöð2 í Íslenska listanum en þar sá ég um fréttainnslög um stjörnur tónlistarbransans,“ segir Erna Hrönn á Facebook-síðu sinni. 

Í síðustu viku var verktakasamningi hennar sagt upp og var hún með sinn síðasta þátt á föstudagskvöldið. 

„Ég tók enga dramatíska kveðjustund í loftinu en þetta hefur verið mikið og stórt ævintýri sem skrítið er að kveðja en hver veit nema röddin muni hljóma síðar á öðrum miðli en það verður tíminn bara að leiða í ljós,“ segir hún jafnframt.