Ragnhildur Alda María Vilhjálmsdóttir, varaborgarfulltrúi Sjálfstæðisflokksins, og Einar Friðriksson læknakandídat gengu í það heilaga í Landakotskirkju 3. júlí síðastliðinn. Þau héldu heljarinnar veislu í Gamla bíói um kvöldið og duttu heldur betur í lukkupottinn þar sem engar takmarkanir vegna heimsfaraldursins voru í gildi þá helgi. 

„Dagurinn hafði verið sérstaklega valinn tæpum tveimur árum á undan eingöngu vegna þesss að dagsetningin innihélt allar lukkutölurnar okkar sem klárlega skiluðu sínu. Enda gátum við varla verið heppnari með tímasetningu eða veðurblíðu,“ segir Alda María. 

Faðir Öldu, Vilhjálmur Egilsson, fylgdi henni upp að altarinu en það er ekki siðurinn í kaþólskum brúðkaupum. „Þetta er vegna þess að í kaþólskri trú er mikið lagt upp úr því að tryggja að tilvonandi brúðhjón séu að gifta sig af fúsum, frjálsum og upplýstum vilja án þess að einhver þrýstingur sé til staðar og til marks um það á brúðurin tæknilega séð að ganga ein inn. Ég ákvað samt að biðja hann pabba að fylgja mér inn, ef ekki bara til að tryggja að ég myndi ganga staðfastlega inn gólfið en ekki hlaupa til Einars af spenningi,“ segir Alda.

Þegar Alda og faðir hennar gengu inn kirkjugólfið ómaði fiðlu- og sellóútgáfa af laginu Can't help falling in love með Elivs Presley en lagið rákust þau Einar á fyrir tilviljun vikuna áður. „Við vissum þá samstundis að þetta lag væri rétta og eina lagið sem kæmi til greina sem undirspilið þegar ég og pabbi gengjum inn. Enda fá lög sem ná því betur hvernig það er að vera ástfanginn upp fyrir haus,“ segir Alda.