Simmi kominn með bílprófið en finnur fyrir tómleikatilfinningu

Sigmar Vilhjálmsson, Simmi Vill, veitingamaður er kominn aftur með bílprófið eftir fjögurra mánaða bílprófsleysi. Hann fékk bílprófið aftur á mánudagsmorgun og segir tilfinningarnar blendnar. 

„Ég keyrði í vinnuna á mánudagsmorguninn,“ segir Simmi í samtali við Smartland og játar að hafa upplifað blendnar tilfinningar. 

„Eins fyndið og það hljómar þá finn ég fyrir ákveðinni tómleikatilfinningu því Villi samstarfsmaður minn hefur sótt mig nánast á hverjum morgni,“ segir hann. Simmi upplifði ákveðin forréttindi að vera sóttur og segist hafa upplifað miklar gæðastundir í þessum bílferðum á morgnana. 

„Hann finnur örugglega tómleikatilfinningu líka,“ segir hann og hlær og bætir við:

„Nú langar mig að verða ráðherra. Það er svo næs að vera með bílstjóra og geta unnið í bílnum á leiðinni í vinnuna.“

Hvaða ráðherra myndir þú helst vilja vera ef til þess kæmi?

„Menntamálaráðherra. Það þarf að styrkja menntamálin,“ sagði Simmi sem keyrir nú eins og vindurinn. 

Simmi ræddi um bílprófið og fleira í nýjasta hlaðvarpsþætti þeirra Huga Halldórssonar. Hægt er að hlusta á þáttinn á hlaðvarpsvef mbl.is. 

• Blogga um frétt