Fagnar 35 ára krýningarafmæli alsæl og ástfangin á Álftanesi

„Ég er nú bara ansi sátt við og stolt af því hvernig ég fór í gegnum það tímabil. En ef ég ætti að velja eitthvað eitt, þá hefði ég alveg verið til í að læra fyrr að annað fólk, það sem það gerir og segir, geti ekki stjórnað líðan minni. Það eru alltaf mínar eigin hugsanir sem stjórna tilfinningum mínum, hvorki annað fólk né kringumstæður. Þetta lærði ég með sjálfsvinnunni sem ég hef gert í gegnum fag mitt, lífsþjálfun,“ segir Linda Pétursdóttir fyrrum heimsfegurðardrottning þegar hún er spurð að því hvað hún hefði viljað vita þegar hún var kosin Ungfrú heimur.

Á morgun eru 35 ár síðan líf Lindu Pé umturnaðist þegar hún, 18 ára stúlka frá Vopnafirði var valin fegurst allra. 

Hvað hefur lífið aðallega kennt þér?

„Það er nú svo margt. Til dæmis að gefast ekki upp þótt á móti blási, að hafa trú á sjálfri mér og halda alltaf áfram. Og mikilvægasta fjárfestingin sem ég geri, er fjárfesting í sjálfri mér; mínum eigin heila.

Það er líka svo gott að muna að lífið fær að vera allskyns og búast ekki við því að hver einasti dagur eigi að vera fullkominn. Hinn fullkomni dagur er líka teygjanlegt hugtak.

Þegar við viljum lifa innihaldsríku og ástríku lífi þurfum við að vera tilbúin að upplifa allar tilfinningar. Lífið hefur sínar andstæður og því fylgir allt litróf tilfinninganna. Ef við viljum upplifa allar góðu tilfinningarnar þurfum við að vera tilbúin í þær erfiðu líka. Við fáum ekki að velja annað hvort. Stóru lífi fylgja stórar tilfinningar. Þegar við opnum á ástina getur því fylgt sorg og söknuður, þegar við opnum á spennuna og tilhlökkunina getur því fylgt vonbrigði, þegar við opnum á stolt og sigurtilfinningu getur því fylgt ótti, sjálfsefi og skömm. Þess vegna finnst mér mikilvægt að opna faðminn fyrir öllum tilfinningunum og minnka ekki líf okkar vegna ótta við að upplifa tilfinningar. Þær eru eðlilegur partur af lífi okkar og þroska. Svo er það í raun bara ákvörðun að hætta að líta í baksýnisspegilinn og fara að horfa fram á við. Það þjónar engum að horfa til baka og velta sér upp úr því hvernig hefði verið hægt að gera hlutina öðruvísi. Það býr til eftirsjá, sektarkennd og gremju. Ég vel mér kröftugar hugsanir sem þjóna mér og koma mér fram á við,“ segir Linda. 

Í tilefni af 35 ára heimsfegurðardrottningarafmæli Lindu ætlar hún að bjóða upp á beina útsendingu á netinu sem hún kallar:  Linda, ljós og skuggar og hefst útsendingin klukkan 12.00 á morgun.

„Þar sem ég mun sitja fyrir svörum, segja frá því hvernig ég hef unnið í því að styrkja sjálfsmynd mína og hvernig ég er að lifa mínu besta lífi núna 53 ára gömul,“ segir Linda. 

Linda fann ástina á dögunum og þegar hún er spurð nánar út í hana segist hún alls ekki hafa átt von á því að verða ástfangin. 

„Já, ástin. Hún er æði. Ég átti ekki von á því að verða ástfangin en svona er nú bara lífið, alltaf að koma manni á óvart, sér í lagi ef maður þorir að stíga út fyrir þægindarammann og gera eitthvað nýtt,“ segir hún og hlær. 

Hvar kynntist þú kærastanum? 

„Kærasti minn hann Jaime og er spænskur. Við kynntumst á Ibiza fyrr á árinu. Hann er yndislegur, skemmtilegur, og algjör herramaður með latneskt blóð í æðum. Svo er hann líka guðdómlega fallegur. Hann er mikið náttúrubarn, vill helst vera berfættur alla daga og synda í sjónum,“ segir Linda og brosir og segir frá því að hann sé staddur á landinu akkúrat núna. 

„Hann er í sinni fyrstu heimsókn á Íslandi núna. Honum finnst kalt hjá okkur en elskar rólegheitin á Álftanesi,“ segir Linda. 

Hvernig verða jólin hjá ykkur?

„Við verðum á Spáni þar til rétt fyrir jól, þá komum við til Íslands og ætlum að njóta þeirra í rólegheitum og rómantík á Álftanesi. Ég elska jólahátíðina og hlakka svo til að verja jólunum með honum,“ segir hún. 

Hægt er að horfa á útsendinguna HÉR.