Stjörnurnar í Bandaríkjunum skörtuðu sínu fegursta á svarta dreglinum á þriðjudagskvöldið þegar tímaritið Elle hélt sína árlegu verðlaunahátíð á hinu glæsilega Four Seasons-hóteli í Beverly Hills í Los Angeles.

Leikkonan Demi Moore var meðal þeirra tíu kvenna sem voru heiðraðar fyrir framúrskarandi störf á sviði menningar og lista. Fyrrverandi mótleikkonur hennar, þær Rita Wilson, Rosie O’Donnell og Melanie Griffith, veittu henni verðlaunin.

Stöllurnar vöktu mikla athygli á dreglinum, sérstaklega Griffith, sem hefur haldið sig frá sviðsljósinu síðustu ár, og stilltu sér upp fyrir myndatökur.

Allar eru þær miklar vinkonur og hafa haldið góðu sambandi allt frá því þær léku vinkonur í kvikmyndinni Now and Then árið 1995. Og þrátt fyrir að um 30 ár séu liðin frá því að kvikmyndin kom út hafa leikkonurnar ekki elst um dag, allar stórglæsilegar. 

Moore birti myndir frá kvöldinu á Instagram-síðu sinni á fimmtudag og sagði það mikinn heiður að hafa verið umkringd góðum vinkonum á kvöldi sem þessu.