Helga María Jónsdóttir er verðlaunaprjónakona

Helga María Jónsdóttir átti mikilli velgengni að fagna í prjónakeppni Vikunnar, sem haldin var í annað sinn á dögunum, því hún hafnaði bæði í fyrsta og þriðja sæti. Í öðru sæti var Oddný Björg Jónsdóttir, en þær Helga María eru þó ekki systur.

„Í fyrra var þemað húfur og treflar en í ár er viðfangsefnið peysur. Eins og sjá má á myndunum er greinilega vinsælt að prjóna á börnin en allar tillögurnar sem við fengum sendar, sem voru yfir tuttugu talsins, voru peysur fyrir minnstu aldurshópana,“ segir Elín Arnar ritstjóri Vikunnar sem sat í dómnefnd ásamt Gunnari Hilmarssyni og Þórunni Högna stílista. 

„Við val á vinningshönnuninni höfðum við að leiðarljósi að flíkin væri vel unnin, falleg, með sniðugar útfærslur og eitthvað sem við myndum vera stolt af að klæða börnin okkar í í dag. Uppskriftirnar að þessum fallegu peysum er að finna í nýjasta tölublaði Vikunnar.“

Sigurvegari keppninnar er Helga María Jónsdóttir og var mat dómnefndar að peysan hennar væri klassísk, falleg og með frumlegum og skemmtilegum útfærslum á kraga og stroffi.

Helga María fékk þriggja rétta máltíð fyrir tvo og gistingu á Hótel Hraunsnefi í Borgarfirði og ársbirgðir af garni frá A4 auk ársáskriftar að tímariti að eigin vali frá Birtíngi. Oddný Björg Jónsdóttir fékk hálfsársbirgðir af garni frá A4 og ársáskrift að tímariti frá Birtíngi.