Alma Geirdal opnar fataskápinn

Alma Geirdal, verslunarstjóri í Oasis í Smáralind, er mikið fyrir fylgihluti og finnst fallegt að nota skargripi og klúta við einfaldan klæðnað, sér í lagi þegar hún vill punta sig. Aðspurð hvort það séu einhver tískuslys í fataskápnum hennar segir hún svo ekki vera.

„Eins og er eru engin söguleg tískuslys í skápnum mínum. Ég rótera í skápnum eins oft og hugsast getur. Ég gef það sem ég nota ekki og passa mig á að eiga engin föt sem eru of lítil, þannig að tískuslysin eru ekki lengi til staðar,“ segir Alma Geirdal.

Hvaða föt myndir þú taka með þér á eyðieyju? „Ég færi með „mömmudressið“ eins og ég kalla það.“

Uppáhaldsflíkin? „Það er bleikur biker-jakki úr Oasis. Ég er þeirrar skoðunar að hver kona þurfi að eiga biker-jakka, enda passa þeir við allt og lifa að eilífu.“

Í hvað myndir þú aldrei fara?
„Ég færi aldrei í flíspeysu. Mér þykir efnið erfitt og svo eyðileggur það allan píuskap.“

Uppáhaldshönnuður? „Andrea.“

Tískufyrirmynd? „Ég spái nú ekki mikið í það, en ef ég velti því fyrir mér þá finnst mér alltaf gaman að fylgjast með Lönu Del Ray. Og svo finnst mér margir íslenskir hönnuðir til fyrirmyndar.“

Hvað eyðir þú miklu í föt á mánuði? „Ég eyði ekki miklu í föt, alls ekki.“

Besta bjútíráðið: „Dekraðu við þig eins og drottningu, klæddu þig eins og bestu vinkonu þína og kíktu oft í spegil.“