Smartland Mörtu Maríu | Tíska | mbl | 27.1.2014 | 16:00 | Uppfært 16:34

Valentino stælir Björk

Svanakjóll Valentinos og svanakjóll Marjan Pejoski. mbl.is/AFP

Hver man ekki eftir svanakjólnum sem Björk Guðmundsdóttir klæddist á Óskarsverðlaunahátíðinni árið 2001. Kjóllinn umdeildi var hannaður af Marjan Pejoski og komst á lista yfir ljótustu kjólana sem sáust á verðlaunaafhendingum það árið.

Fatahönnuðurinn Valentino frumsýndi hins vegar sína útgáfu af svanakjólnum fræga á Haute Couture-tískusýningu. Kjóll Valentinos er gerður úr tjulli og handsaumuðum fjöðrum og hefur hlotið mikið lof gagnrýnenda.

Samkvæmt heimildum Yahoo er óneitanlega einhver munur á kjól Pejoski sem Björk klæddist og þeim sem Valentino hannaði. Kjóllinn sem Björk klæddist þótti meira eins og grímubúningur þar sem að svanshaus hékk yfir öxl hennar og pilsið á kjólnum var eins og búkurinn á svani. Gagnrýnendur voru ekkert að spara stóru orðin á sínum tíma er þeir gagnrýndu kjólinn og einn sagði meðal annars: „Sorglegi parturinn við svanakjól Bjarkar var að svanurinn var enn á lífi á æfingunum.“ Björk svaraði þessum gagnrýnisröddum og sagði: „Þetta er bara kjóll.“

Á sínum tíma hafði Valentino þetta um kjólinn að segja: „Af hverju svanakjóll? Af hverju ekki? Ég þoli ekki takmarkanir,“ sagði Valentino í samtali við People og bætti við: „Björk er ekki að pæla í því hvað öðrum finnst. Ef hönnun mín heillar þig eða fær þig til þess að vilja æla, þá hef ég afrekað eitthvað.“