Ítalska tískuhúsið GUCCI sýndi haust- og vetrarlínu sína fyrir næsta haust á tískuvikunni í París. Það sem kom á óvart er að stígvélin eru að koma sterk inn aftur eftir smáhlé. Síðan í haust hafa ökklaskór verið meira áberandi en nú eru stígvélin að gera allt vitlaust á ný. Ekki vill GUCCI eingöngu hafa kvenpeninginn í svörtum leðurstígvélum heldur koma slönguskinnsstígvélin alveg tryllt inn í haust.

Það er svolítið langt síðan slönguskinnið var málið síðast - ætli það hafi ekki verið á árunum 1999-2000 sem það gerði allt vitlaust. En nú kveður við annan tón. Það verður engin kona með konum nema að hleypa slönguskinninu inn í líf sitt á ný. Og svo eru litirnir fallegir. Ljósbleikar kápur, hlébarðamunstur og gular leðurtöskur verða áberandi. Miðað við þetta allt er bara fáránlega gott haust í vændum.