Emilia Clarke í íslenskri hönnun

Breska leikkonan Emilia Clarke, sem leikur drekamóðurina Daenerys Targaryen í Game of Thrones, klæðist Jökla Parka-úlpu frá 66°Norður á mynd sem hún birti af sjálfri sér á Instagram. Leikkonan tekur sig vel út í íslenskri hönnun en þessi flotta leikkona hefur heldur betur slegið í gegn drekamóðirin í þessari geysilega vinsælu sjónvarpsþáttaröð.

Hún hefur komið nokkrum sinnum til Íslands til að leika í Game of Thrones. Í janúar síðastliðinn voru tökur á áttundu og síðustu þáttaröð Game of Thrones hér á landi þar sem bæði Emilia Clarke og Kit Harrington, sem leikur John Snow, voru stödd á landinu. Var það í fjórða skipti sem tökur á Game of Thrones fóru fram hér á landi með leikurum og tökuliði. Gríðarleg spenna ríkir fyrir síðustu þáttaröðina sem sýnd verður á næsta ári. 

HBO-framleiðendur Game of Thrones hafa reglulega keypt vörur frá 66°Norður og meðal annars jólagjafir fyrir alla leikara og tökulið þáttanna. Þurfti 66°Norður að sérsauma talsvert af flíkum vegna þess að leikarar eru af öllum stærðum og gerðum eins og aðdáendur þáttanna ættu að þekkja vel en þar á meðal eru dvergurinn Tyrion Lannister, leikinn af Peter Dinklage, og Ser Gregor Clegane eða Fjallið sem leikinn er af Hafþóri Júlíusi Björnssyni, sterkasta manni heims.

• Blogga um frétt