Alma Dagbjört Möller landlæknir hefur verið áberandi undanfarnar vikur vegna kórónuveirufaraldursins. Alma hefur vakið sérstaka athygli fyrir fallegan og klassískan klæðaburð á daglegum blaðamannafundum. Nokkur umræða hefur átt sér stað um fatnað hennar bæði á samfélagsmiðlum og kaffistofum landsins. 

Alma hefur klæðst nokkrum flíkum frá sænska merkinu Stenströms á blaðamannafundunum undanfarnar vikur. Merkið á sér yfir 100 ára gamla sögu og fæst meðal annars í Hjá Hrafnhildi. Ekki er ólíklegt að Alma hafi kynnst merkinu í Svíþjóð en þar bjó hún og starfaði um tíma. 

Alma vakti sérstaka athygli þegar hún klæddist fallegri herðaslá með gylltum tölum um helgina. Á vef Stenströms má finna herðaslána, sem er úr 100 prósent merinóull. Flíkin kostar 289 evrur eða um 45 þúsund á gengi dagsins í dag.

Í vefversluninni má finna margar skyrtur með fallegum slaufum rétt eins og Alma er vön að klæðast. Verslunin Hjá Hrafnhildi selur vörur sænska merkisins á Íslandi og má til að mynda finna fallega skyrtu í vefverslun búðarinnar með fallegri slaufu í anda þess sem Alma klæðist. Kostar sú skyrta 39.980. 

Alma tók við landlæknisembættinu fyrir tæpum tveimur árum og þegar myndasafn mbl.is og Morgunblaðsins er skoðað kemur afgerandi fatastíll hennar bersýnilega í ljós.