Herrafataverslun Birgis lokar

Herrafataverslun Birgis mun loka hinn 28. febrúar næstkomandi. Birgir Georgsson, eigandi verslunarinnar, greinir frá þessu í færslu á Facebook-síðu verslunarinnar. Birgir greindist með Parkinson sjúkdóminn fyrir nokkrum árum og segir þrekið nú vera búið. 

„Eins og mörg ykkar vita greindist ég með Parkinson fyrir nokkrum árum og nú er þrekið búið. Vegna þessa hef ég ákveðið að loka versluninni þann 28. febrúar. Okkur búðinni langar að bjóða okkar góðu og tryggu viðskiptavinum sem staðið hafa með okkur í hartnær 32 ár, að koma í eina síðustu heimsókn. Það er mörgum sem ber að þakka, ekki síst eiginkonum ykkar sem hafa drifið ykkur á staðinn,“ skrifar Birgir í færslu sinni. 

Í versluninni verður 60% afsláttur af öllum vörum frá og með morgundeginum. 

Birgir Georgsson (t.h.) ásamt Sveinbirni Birgissyni (t.v.) og Guðjóni Hafsteini Guðmundssyni.

• Blogga um frétt