Leikkonan Penélope Cruz klæddist sérsaumuðum kjól frá franska tískuhúsinu Chanel þegar hún mætti á Óskarinn á sunnudaginn. Hún var tilnefnd sem besta leikkona ársins fyrir leik sinn í Pedro Almodovar myndinni Parallel Mothers.

Mikil vinna fór í að sauma og hanna hinn fullkomna kjól á Cruz en innblásturinn var sóttur í haust og vetrarlínu Chanel 2020 til 2021. Það tók 680 klukkutíma að sauma kjólinn en hann er handsaumaður að hluta til og mikið listaverk. Það þurfti til dæmis að sauma niður hvern einasta stein sem prýðir kragann. 

Fólk sem hefur vit á saumaskap áttar sig líka á því að það tekur tíma að festa allar tölurnar á sem prýða framhlið kjólsins. Auk þess þarf töluverða kunnáttu til þess að kjóllinn sitji rétt yfir brjóststykkið og fari ekki að kiprast við minnstu hreyfingar. 

Fagmenn franska tískuhússins Chanel eru þó engir viðvaningar og kunna réttu handtökin þegar kemur að vönduðum vinnubrögðum, efnisvali og frágangi. Myndbandið af ferli kjólsins fékk Smartland Mörtu Maríu sent frá tískuhúsinu Chanel í París rétt í þessu.