Smartland Mörtu Maríu | Tíska | mbl | 16.9.2023 | 6:00

Guðrún Sveina er 79 ára fyrirsæta sem lætur ekkert stoppa sig

Guðrún Sveina Jónsdóttir starfaði sem ljósmóðir en er nú fyrirsæta. Ljósmynd/66°Norður

Guðrún Sveina Jónsdóttir verður áttræð á næsta ári en lætur það ekki stoppa sig. Hún tók að sér nýtt hlutverk nýlega þegar hún gerðist fyrirsæta. Guðrúnu líður hvergi betur en á hreyfingu sem hún stundar bæði á Íslandi og erlendis.

„Ég hef alltaf verið mikið fyrir útivist, frá því ég var mjög ung. Ég er frá Þingeyri við Dýrafjörð og þar var ekkert bíó eða neitt þegar ég var að alast upp þannig að ég var stöðugt á skíðum og skautum eða uppi um fjöll og firnindi sem krakki. Þannig hefur það verið síðan," segir Guðrún Sveina Jónsdóttir sem er 79 ára og er fyrirsæta hjá 66°Norður. Guðrún situr meðal annars fyrir í nýrri dúnkápu Slippurinn sem var kynnt hjá íslenska fataframleiðandanum á dögunum.

Guðrún starfaði alla sína tíð sem ljósmóðir á kvennadeild Landspítalans og segist hlæjandi ekki kunna neitt annað. „Ég var alltaf á ferðinni þar líka. Það er ekkert hægt að sitja mikið við þá vinnu.“

Hún verður áttræð næsta sumar en segist ekkert finna fyrir aldrinum. „Ég fór Jökulfirðina í sumar og svo var dóttir mín að segja mér að við værum á leið í kajak-ferð. Ég er aldrei spurð hvort ég vilji fara með, það er bara gert ráð fyrir því,“ segir hún.

Guðrún Sveina er töff í samfestingnum Flot frá 66°Norður. Ljósmynd/66°Norður

Þýðir ekkert að snúa við

Guðrún er rokin út að ganga klukkan sjö alla morgna – alein því það tefur hana að hafa fólk í eftirdragi – og hún hefur þrætt allar helstu gönguleiðir landsins. Þegar hún er ekki að ganga fer hún í ræktina eða spilar golf. Hún hefur gengið út um allan heim, til að mynda á Tenerife og Grikklandi og Jakobsveginn fór hún ásamt dóttur sinni og ömmubarni árið 2016, alls 319 kílómetra á fjórtán dögum. Hún býr á sjöttu hæð og notar helst ekki lyftuna. „Ég var að minnka við mig og fara úr íbúð á þriðju hæð þar sem var ekki lyfta. Að ganga stigann gerir mér svo gott.“

„Mér líður hreinlega svo vel af þessu. Hreyfing og útivist er næring fyrir sál og líkama. Ég hugsa að heilsan væri ekki sú sama ef ég hreyfði mig ekki svona mikið. Auðvitað getur stundum verið erfitt að ganga upp brött fjöll eða þess háttar. En það þýðir ekkert að snúa við, bara að halda áfram. Bara drífa sig af stað. En auðvitað skiptir máli að vera vel búin. Ég er alltaf í 66°Norður, stundum frá toppi til táar. Þetta er bara yndislegur klæðnaður sem hefur reynst mér vel í alls konar veðri og vindum, bæði hérlendis og til dæmis á Jakobsveginum,“ segir Guðrún ennfremur.