Tónlistarkonan Laufey Lín Jónsdóttir kom, sá og sigraði á Grammy-verðlaunahátíðinni í Los Angeles í gær. Laufey sem hlaut verðlaun fyrir plötuna Bewitched vakti líka athygli á rauða dreglinum fyrir fallegan klæðaburð. 

Bleiki kjóllinn sem Laufey klæddist var frá franska tískuhúsinu Chanel en þetta er ekki í fyrsta skipti sem hún klæðist fötum frá tískuhúsinu. Bleiki liturinn hefur verið sérstaklega mikið í tísku undanfarið ár eða síðan kvikmyndin Barbie kom út. Doppótta mynstrið dettur aldrei úr tísku og er oft áberandi í hönnun Chanel.

Á meðan Laufey valdi klassískt voru margar stjörnur sem tóku meiri áhættu á rauða dreglinum. Svarti liturinn var áberandi og margar tónlistarkonur klæddust kjólum sem þær myndu ekki klæðast í kaffiboði hjá ömmum sínum. 

Hér fyrir neðan má sjá fleiri stjörnur á rauða dreglinum.