Smartland Mörtu Maríu | Tíska | mbl | 8.5.2024 | 22:00 | Uppfært 9.5.2024 8:17

Tekur fermingarversið með sér hvert sem hann fer

Um hálsinn geymir Arnar Þór forsetaframbjóðandi kross og ritningarversið sem hann þuldi er hann fermdist. Samsett mynd

Guðrækni Arnars Þórs Jónssonar skín í gegn í fatastíl forsetaframbjóðandans, hvort sem það er skóvalið eða skartgripirnir.

Arnar Þór Jónsson leggur mikla áherslu á trú í sínu forsetaframboði. Hann hefur sagt að Jesús Kristur sé sín helsta fyrirmynd og að eitt af sínum fyrstu verkefnum sem forseti væri að setja kross á Bessastaðakirkju.

Það ætti því ekki að koma kjósendum á óvart að hann beri trúna með sér hvert sem hann fer. Það gerir hann í formi hálsmens.

Um háls Arnars hangir kross, en einnig skjöldur áritaður ritningarversinu sem Arnar þuldi er hann fermdist, samkvæmt upplýsingum frá framboðsteymi Arnars.

Frétt af mbl.is

Frambjóðandi hnyklaði vöðvana með áhrifavaldi

Í munkaskóm og með Frímúrarahring

Þegar Arnar er ekki í sundskýlu að taka á því með áhrifavöldum klæðist hann sérsaumuðum jakkafötum úr Herragarðinum.

Framboðsteymi Arnars sendi Smartlandinu svokallaða „fit pic“ af frambjóðandanum. Ljósmynd/Aðsend

Jakkafötin eru dökk en til þess að lífga upp á litasamsetninguna klæðist hann gjarnan röndóttu bindi.

Arnar Þór Jónsson. mbl.is/Kristinn Magnússon

Þá gengur hann einnig um í brúnum leðurskóm með sylgju, svokölluðum munkaskóm – sem gæti rímað við áherslur Arnars á kristna trú en gæti líka verið tilviljun.

Brúnu skórnir bæta einnig smá lit í jakkafatasamsetninguna. Þetta er jú forsetaframboð, ekki kistulagning. Skórnir eru frá Lloyd og fást á skor.is.

Þá klæðist hann oft tveimur hringum: giftingarhringnum annars vegar og hins vegar hring frá Frímúrarareglunni.