Jón Gnarr forsetaframbjóðandi skartar gjarnan íslenskri hönnun, t.d. ljósbrúnu jakkafatasetti frá Kormáki og Skildi. Aftur á móti klæðist hann sjaldan bindi.

Það kennir kannski ekki margra grasa í jakkafatatísku karlkyns forsetaframbjóðendanna. Herrarnir virðast flestir klæðast sömu dökku slim-fit kambgarns jakkafötunum. Kannski vilja þeir líta út á eins og Guðni Th. Jóhannesson forseti.

Þeir eiga fyrir vikið lítið roð í tískudrottningu eins og Ásdísi Rán, að minnsta kosti ekki hvað stílinn varðar. Nema kannski Jón Gnarr, sem hristir upp í leiknum.

Tímalaus töffaraskapur

Þegar Jón tilkynnti framboð var hann búinn ljósbrúnu jakkafatasetti frá Kormáki og Skildi. Jakkafötin eru létt og sumarleg, og klæða frambjóðandann vel.

Svipuð jakkaföt má einmitt finna í nýrri sumarlínu Kormáks og Skjaldar.

Brúnir litir virðast vera í miklu uppáhaldi hjá forsetaframbjóðandanum. Jón hefur nefnilega einnig sést í brúnum tvíd-jakkafötum frá þýska herrafatamerkinu Pike Brothers, sem nú er orðið erfiðara að rekast á hér á landi.

Fatamerkið var á árum áður selt í versluninni Kickstart á Vesturgötu í Reykjavík sem lokaði dyrum sínum 2015. Verslunin bar slagorðið „Tímalaus töffaraskapur“ sem lýsir svo sem einnig fatastíl Jóns nokkuð vel. 

Sleppir bindinu

En jafnvel í fínum jakkafötum sleppir Jón slifsinu, skilur frekar efsta hnappinn eftir óhnepptan – jafnvel efstu tvo – og þannig má endrum og sinnum sjá glitta í hálsmen undir skyrtunni.

En hvers vegna klæðist Jón aldrei bindi? Jón er þjóðinni kunnugur sem ákveðinn sprelligosi, eins og Eiríkur Bergmann stjórnmálafræðingur orðaði það í Dagmálaviðtali, en hefur í raun ekki leyft sprelligosanum að skína í kosningabaráttunni, enda vill hann vera álitinn sem alvarlegur kostur í embættið.

Passar bindisleysið þá ekki einmitt við þá ímynd sem Jón Gnarr vill skapa? Jakkafötin segja að honum sé alvara um forsetaframboðið en bindisleysið segir að hann sé afslappaður, ekkert of stífur.

Eða kannski hefur hann einfaldlega gleymt hvernig á að binda bindishnút, eins og margir ættu kannast við.

Miðaldra menn hættir að klæðast bindum

Það heyrir enn til undantekninga að Guðni Th. sé gómaður bindislaus en mögulega mætir Jón með nýja tískubylgju á Bessastaði, verði hann kjörinn.

Miðaldra karlmenn eru margir löngu farnir að sætta sig við bindisleysið. Spara slifsin frekar fyrir tilefni.

Þá eru heldur engin stórtíðindi að forsetar klæðist jakkafötum án bindis. Í síðasta mánuði vakti það athygli þegar þrír forsetar Bandaríkjanna, tveir fyrrverandi og einn núverandi, náðust á sömu mynd – allir bindislausir.

Örlög vasaklútsins

Er bindið dottið úr tísku? „Ekkert bindi“ virðist nefnilega orðið nýja bindið og slifsið mætir því sömu örlögum og vasaklúturinn. Ætli sjálfur jakkinn verði næstur? Kannski buxurnar?

Það er samt ekki hjá því litið að í bindinu felst einhver kraftur, eins og mátti sjá á blaðamannafundi í apríl þegar Bjarni Benediktsson tilkynnti sig forsætisráðherra. Þar voru forystumenn ríkisstjórnarinnar allir með bindi um hálsinn, smá í stíl við andarungana Ripp, Rapp og Rupp.