Tískusýning undirfatafyrirtækisins Victoria's Secret sneri aftur eftir sex ára hlé í New York í gær. Sýningin var stjörnum prýdd en þar mátti meðal annars sjá Tyru Banks, Cörlu Bruni, Kate Moss, Vittoria Ceretti og Ashley Graham. Ofurfyrirsætan Banks gekk niður tískupallinn í korseletti og svörtum leggings en nítján ár eru liðin síðan hún gekk fyrir fyrirtækið.

Hætti hún til að einbeita sér frekar að sjónvarpsferlinum en hún var aðallega fræg fyrir hlutverk sitt í raunveruleikaþáttunum America's Next Top Model. Margir voru ósáttir við endurkomu Banks vegna ummæla sem hún lét ítrekað falla í þáttunum eins og þau að fyrirsætur yrðu að vera „mjórri en mjóar" til að komast áfram í bransanum. 

Virkir í athugasemdum á Twitter sögðu þá einnig sýninguna hafa verið þá leiðinlegustu sem Victoria's Secret hefur haldið.

Hér fyrir neðan eru myndir frá sýningunni.