Íslenska hönnunarmerkið As We Grow kynnti spennandi nýjung á dögunum þar sem viðskiptavinum býðst að koma með notaðar flíkur í verslunina og fá inneign í staðinn. Hugmyndin er þáttur í að sporna gegn fatasóun og bjóða öllum þeim sem eiga As We Grow flíkur möguleikann á því að gefa þeim framhaldslíf.

As We Grow Aftur er ný viðbót þar sem viðskiptavinum býðst að koma með gamlar flíkur í verslunina sem staðsett er í miðbæ Reykjavíkur og fá í staðinn inneign upp í nýja flík eða skipta í aðra notaða. Flíkurnar sem koma inn verða svo til sölu á sérstakri slá í versluninni og geta viðskiptavinir keypt þær flíkur á sanngjörnu verði. 

As We Grow aftur mun nýtast mörgum sem þurfa til dæmis að fá stærri stærðir af barnafötum.

Peysan kom undan snjóskafli

Upphafið að As We Grow varð til út frá peysu sem móðir í fjölskyldunni prjónaði og gekk á milli barna og fjölskyldna í áraraðir. Peysan varð uppáhaldsflík þeirra allra. Eitt árið týndist hún en kom svo undan snjóskafli um vorið og hélst áfram í notkun. Þessi saga heillaði stofnendur fyrirtækisins og veitti þeim innblástur til að búa til flíkur sem gætu gengið á milli manna eins lengi og þessi peysa. Flíkur As We Grow eru hannaðar með það að markmiði að þær geti enst, eru klassískar og tímalausar og gerðar úr hágæðaefnum.

As We Grow hefur átt mikilli velgengni að fagna. Það er eina íslenska fatahönnunarmerkið sem hefur hlotið Hönnunarverðlaun Íslands og hlotið hin virtu bresku Junior Design verðlaun þrjú ár í röð, nú síðast sem besta umhverfisvæna merkið.

„Neytendur eru sífellt meðvitaðri um aukna sjálfbærni, nýtni, sanngirni og umhverfisvernd bæði hér á landi og erlendis. Það er markmið As We Grow er að vera í forsvari í baráttunni gegn fatasóun og lítur fyrirtækið í því tilliti meðal annars til heimsmarkmiða Sameinuðu þjóðanna um ábyrga neyslu og framleiðslu. Þessi markmið ríma einstaklega vel við gildi og afstöðu fyrirtækisins til að leggja sitt af mörkum í þágu umhverfisins, einkum hvað varðar líftíma og endingu framleiðslunnar á tímum ofgnóttar,“ segir í fréttatilkynningu.

As We Grow varð til út frá peysu sem entist einni fjölskyldu í áraraðir.

Tengdar fréttir

Hönnun

Inga Birna og Guðmundur selja lúxushús í Mosfellsbæ

• Myndaveisla: Hönnunarverðlaun Íslands
• Glæsihús í Garðabæ selt á 350 milljónir án auglýsingar
• Félag Björgólfs Thors selur lúxusíbúð við höfnina
• Erla og Tryggvi unnu til verðlauna

» Fleiri tengdar fréttir

• Blogga um frétt