Donald Trump sver embættiseið sem 47. forseti Bandaríkjanna í dag. Athöfnin fer fram í þinghúsinu og er gríðarlegur kuldi í borginni. Venjan er að athöfnin fari fram utanhúss en vegna kuldans hefur verið gerð breyting á. 

Við hlið hans er eiginkona hans og verðandi forsetafrú Bandaríkjanna, Melania Trump. Hún valdi sér stílhreinan fatnað við tilefnið í morgun frá ameríska fatahönnuðinum Adam Lippes. Trump klæddist silki- og ullarkápu og pilsi með beinhvítri blússu. Hatturinn er frá ameríska hattahönnuðinum Eric Javits.

„Fatnaður Trump var búinn til af færasta handverkafólki í Ameríku. Ég er stoltur af því að geta sýnt heiminum afraksturinn,“ segir Lippes í tilkynningu. 

Frá Evrópu yfir til Ameríku

Trump hefur átt uppáhaldshönnuði og tískuhús í gegnum tíðina og hefur klæðst fatnaði frá Dolce & Gabbana, Alexander McQueen og Christian Dior. Síðustu mánuði hefur hún fært sig meira yfir í ameríska fatahönnuði eins og Ralph Lauren og nú Adam Lippes.

Fötin frá Adam Lippes voru sérsaumuð á Melaniu en svipuð kápa frá merkinu kostar á gengi dagsins í dag í kringum 750 þúsund krónur. Svart ullarpils frá tískuhúsinu kostar í kringum 240 þúsund krónur.