„Ekki leiðinlegt að hafa þau tvö“

Vikt­or Örn Mar­geirs­son var held­ur bet­ur áber­andi þegar Breiðablik vann sinn fimmta sig­ur í röð í Pepsi-deild karla í knatt­spyrnu í kvöld. Liðið vann þá Vík­ing Reykja­vík, 3:2, þar sem Vikt­or skoraði tvö marka Breiðabliks. Hann hafði ekki skorað í efstu deild fyr­ir leik­inn.

Frétt af mbl.is

Mikið fjör og fimmti sig­ur Blika í röð

„Þetta var gam­an. Ég sá fyr­ir mér að við mynd­um skora úr föst­um leik­atriðum og það var gam­an að skora. Ekki leiðin­legt að hafa þau tvö,“ sagði Vikt­or, sem hef­ur unnið sér inn sæti í vörn Blikaliðsins en haldið Elfari Frey Helga­syni á bekkn­um. Frammistaðan í kvöld hlýt­ur að vera enn frek­ar vatn á myllu hans í sam­keppn­inni.

„Það er mjög góð sam­keppni við Damir og Elf­ar. Við erum með frá­bæra vörn, sama hver spil­ar, og gott að hafa góða sam­keppni. Fyrst og fremst er ég varn­ar­maður og hefði viljað halda hreinu,“ sagði Vikt­or.

Þegar Vík­ing­ur komst yfir eft­ir hálf­tíma leik varð liðið um leið það fyrsta til þess að skora í fyrri hálfleik gegn Blik­um í sum­ar.

„Maður er alltaf svekkt­ur að fá á sig mark, en það er ekki hægt að fá á sig mark í öll­um leikj­um. Það er mjög góð stemn­ing í hópn­um og það held­ur okk­ur á tán­um. Við erum góðir vin­ir í liðinu og það eru all­ir að róa í sömu átt. Við höld­um okk­ar striki, erum klár­ir í hvern ein­asta leik og þegar við ger­um okk­ar þá náum við yf­ir­leitt góðum úr­slit­um,“ sagði Vikt­or Örn Mar­geirs­son við mbl.is.

• Blogga um frétt