Marija Radojičić áfram með Fylki

Marija Radojičić hefur skrifað undir nýjan tveggja ára samning við knattspyrnudeild Fylkis. Þetta kemur fram í fréttatilkynningu sem send var út til fjölmiðla.

Marija, sem er serbneskur landsliðsmaður og er fædd árið 1992, kom til Fylkis fyrir tímabilið og hefur skorað 12 mörk í 20 leikjum fyrir félagið. Hún hefur þótt passa vel inn í hópinn og er almenn ánægja með hana í Árbænum.

„Ég er virkilega ánægður með það að Marija hafi ákveðið að vera áfram í herbúðum okkar og gera samning við félagið til tveggja ára. Marija hefur sýnt það í sumar að hún er gríðarlega góður leikmaður sem hefur mikla fótboltahæfileika, góðan leikskilning og mikið markanef. Þá hefur hún smellpassað inn í hópinn félagslega. Í Fylki líður Mariju vel, hér vill hún vera og hér viljum við alveg endilega hafa hana,“ segir Kjartan Stefánsson, þjálfari meistaraflokks kvenna.

• Blogga um frétt