Óli Stefán efstur á blaði hjá KA

Óli Stefán Flóventsson, þjálfari Grindavíkur í úrvalsdeild karla í knattspyrnu, Pepsi-deildinni, er efstur á blaði hjá knattspyrnudeild KA um að taka við liðinu af Srdjan Tufegdzic, núverandi þjálfara liðsins, en þetta staðfesti Sævar Pétursson, framkvæmdastjóri KA, í samtali við mbl.is í dag.

Óli tilkynnti það fyrr í þessum mánuði að hann myndi hætta sem þjálfari Grindavíkur þegar tímabilinu í Pepsi-deildinni lyki en hann hefur stýrt liðinu frá árinu 2016. Síðasta umferð deildarinnar fer fram á laugardaginn næsta þegar Grindavík fær ÍBV í heimsókn. Þá var einnig staðfest á dögunum að Srdjan Tufegdzic yrði ekki áfram með KA en hann hefur stýrt liðinu frá árinu 2016.

Sævar sagði í samtali við mbl.is að hann vonaðist til þess að geta sest niður með Óla Stefáni á þriðjudaginn í næstu viku til þess að fara betur yfir málin. KA hefur nú þegar sett sig í samband við umboðsmann Óla Stefáns en þjálfarinn gaf það sjálfur til kynna að hann ætlaði sér ekki að ræða um framtíð sína, fyrr en að tímabili loknu.

• Blogga um frétt