Knattspyrnumaðurinn Stefán Þór Pálsson er genginn í raðir Víkings í Ólafsvík en hann kemur til félagsins frá ÍR.
Stefán er 23 ára gamall en hefur leikið yfir 100 leiki í meistaraflokki og skorað í þeim 20 mörk. Hann er uppalinn ÍR-ingur og lék með liðinu síðustu tvö ár í 1. deild en liðið féll í fyrra.
Stefán hefur einnig leikið með Breiðabliki, Grindavík, KA og Víkingi R. en hann á að baki 18 leiki í efstu deild.
Ólafsvíkingar hafa líka fengið bakvörðinn Kristófer Jacobson Reyes sem hefur leikið með Fram undanfarin þrjú ár en hann var áður í Ólafsvík.
Víkingur Ó. varð í 4. sæti 1. deildar, eða Inkasso-deildarinnar, á síðustu leiktíð.