Galið að leikmenn fái líflátshótanir

„Nei, því þetta er eitthvað sem við áttum engan þátt í. Við einbeittum okkur bara að fótboltanum. Það er okkar vinna,“ sagði Erik Hamrén, þjálfari karlalandsliðs Íslands í fótbolta, aðspurður hvort hann hefði á einhvern hátt nýtt fjandsamleg ummæli stuðningsmanna tyrkneska landsliðsins til að undirbúa sitt lið fyrir 2:1-sigurinn á Tyrklandi í kvöld.

Hluti stuðningsmanna tyrkneska liðsins hefur angrað Íslendinga mjög á samfélagsmiðlum síðustu tvo sólarhringa, með hótunum, í kjölfar þess að leikmenn Tyrklands kvörtuðu undan því sem þeir töldu vera ósanngjarna meðferð við komuna til Íslands á sunnudag. Fannst leikmönnunum of langan tíma taka að komast í gegnum öryggisleit á Keflavíkurflugvelli. Ekki bætti svo úr skák misheppnað grín belgísks manns sem þóttist taka viðtal við fyrirliða Tyrklands með uppþvottabursta á flugvellinum.

Hamrén var hikandi þegar hann var spurður út í þessi mál á blaðamannafundi í kvöld, og hvort hann hefði nýtt þau til að hafa hvetjandi áhrif á sína leikmenn, en sagði svo:

„Ég veit ekki hvort ég ætti að tjá mig um þetta, en mér fannst það sorglegt að heyra í gær, að margir landsliðsmanna Íslands, ekki bara úr karlalandsliðinu heldur líka úr kvennalandsliðinu og jafnvel U17-landsliðum, hefðu fengið hótanir. Þá þykir mér veröldin orðin galin. Leikmennirnir eiga engan þátt í þessu, eru algjörlega saklausir, en fá svo líflátshótanir. Þá finn ég til með fólki og finnst þetta orðin galin veröld. En við notuðum þetta ekki neitt í okkar undirbúningi. Hann snerist bara um fótboltann,“ sagði Hamrén.

Frétt af mbl.is

Þess vegna tók ég að mér þetta starf

Erik Hamrén sendir Hörð Björgvin Magnússon inn á völlinn gegn Tyrkjum í kvöld. mbl.is/Hari

• Blogga um frétt