Fyrrverandi leikmaður Grindavíkur skoraði gegn Frökkum

Hin bras­il­íska Thaisa de Moraes Rosa Mor­eno var á skot­skón­um í gær þegar Bras­il­ía féll úr leik í sex­tán liða úr­slit­um HM kvenna í knatt­spyrnu sem fram fer í Frakklandi eft­ir tap gegn Frökk­um. Leikn­um lauk með 2:1-sigri franska liðsins í fram­lengd­um leik á Océa­ne-vell­in­um í Le Havre en Val­erie Gau­vin kom franska liðinu yfir á 52. mín­útu áður en Thaisa jafnaði met­in fyr­ir Bras­il­íu á 63. mín­útu.

Það var svo Ama­dine Henry sem tryggði Frökk­um sig­ur með marki á 106. mín­útu og Frakk­ar fóru áfram í átta liða úr­slit­in. Thaisa lék með Grinda­vík í úr­vals­deild kvenna, sum­arið 2017 en hún kom til fé­lags­ins ásamt samlanda sín­um Ril­any Agui­ar da Silva frá Tyr­esjö í Svíþjóð. Thaisa lék sjö leiki fyr­ir Grinda­vík í efstu deild þar sem hún skoraði eitt mark en það kom í 2:1-sigri gegn Hauk­um í Grinda­vík.

Thaisa gekk til liðs við Sky Blue í banda­rísku at­vinnu­manna­deild­inni árið 2018 frá Grinda­vík og lék átta leiki fyr­ir fé­lagið áður en hún samdi við sitt nú­ver­andi fé­lag, Mil­an, sem þá var ný­stofnað en liðið leik­ur í ít­ölsku B-deild­inni.

• Blogga um frétt