Ída Marín munurinn á liðunum

Kristján Guðmundsson, þjálfari Stjörnunnar, sagði Ídu Marín Hermannsdóttur vera muninn á liðunum er Stjarnan tapaði fyrir Fylki, 1:3, í Pepsi Max-deildinni í fótbolta í kvöld. Ída skoraði tvö og lagði upp eitt fyrir Fylki. 

„Tóninn var gefinn á fyrstu mínútu. Við áttum góða sókn í byrjun. Svo fær Ída Marín boltann og fær dauðafæri sem Birta ver og það gaf tóninn fyrir það sem var að gerast. Ída Marín var munurinn á liðunum í dag. Þegar hún kemst á ferðina er erfitt að stoppa hana. Hún er gríðarlega skemmtilegur og efnilegur leikmaður," sagði Kristján. 

Hann skilur hvers vegna Ída fékk víti í upphafi seinni hálfleiks. Hún skoraði sjálf úr vítinu og kom Stjörnunni í 2:0. „Anna María nær boltanum fyrst en svo sýnist mér hún fara í hana. Ég skil af hverju dómarinn dæmi víti."

Þrátt fyrir tapið var Kristján ánægður með eitt og annað í leik síns liðs. 

„Fyrst og fremst börðumst við og skoruðum mark í lokin sem mér þykir vænt um. Þær börðust svo áfram og gáfust ekki upp. Uppspilskaflarnir voru oft ágætir en við erum ekki að skjóta markið fyrr en í lok leiksins."

Stjarnan hefur aðeins unnið einn leik af síðustu tíu í öllum keppnum og er liðið aðeins þremur stigum frá fallsæti. 

„Þetta er þéttur pakki og mjög svipuð lið. Ef að einstaklingur kemst í gang eins og í þessum leik þá skilur það oft liðin af í leikjunum. Við gerum okkar mistök og við erum að reyna að möndla saman lið. Ég er frekar hress með stelpurnar, en auðvitað er hundleiðinlegt að tapa," sagði Kristján. 

• Blogga um frétt