Glæsimark skildi liðin að í Garðabæ

Shameeka Fishley reyndist hetja Stjörnunnar þegar liðið fékk ÍBV í heimsókn í 12. umferð úrvalsdeildar kvenna í knattspyrnu, Pepsi Max-deildarinnar, á Samsung-vellinum í Garðabæ í dag.

Leiknum lauk með 1:0-sigri Garðbæinga en Fishley skoraði sigurmarkið á 86. mínútu með laglegu einstaklingsframtaki.

Ingibjörg Lúcía Ragnarsdóttir sendi þá boltann fram völlinn úr öftustu víglínu á Fishley sem tók boltann niður og þrumaði honum svo upp í samskeytin nær og þar við sat.

Stjarnan fer með sigrinum upp í sjötta sæti deildarinnar í 11 stig en ÍBV er í fimmta sætinu með 16 stig.

Markvörðurinn með allt á hreinu

Garðbæingar voru mikið að reyna að þræða sig í gegnum vörn Eyjakvenna en höfðu ekki erindi sem erfiði.

Sóknarleikurinn var ekki upp á marga fiska og það skorti oft á tíðum gæðin á síðasta þriðjungi vallarins en töfrar frá Shameeku Fishley sáu um að tryggja Stjörnunni þrjú stig.

Markvörðurinn Erin McLeod var besti leikmaður Stjörnunnar en hún hélt liði sínu inni í leiknum á löngum köflum og átti nokkrar frábærar vörslur.

Fjöldi færa fór forgörðum

Eyjakonur voru sterkari aðilinn í leiknum og þær eru klárlega afar ósáttar með að tapa leiknum.

Miyah Watford fór illa með nokkur færi í leiknum og hún sefur eflaust ekkert allt of vel í nótt.

Eyjakonur voru gríðarlega þéttar til baka, með fjóra til fimm leikmenn sem einfaldlega fara ekki yfir miðju, en það bjargaði þeim ekki þegar þær fengu á sig sigurmarkið.

Stjarnan	1:0	ÍBV	Opna lýsingu Loka
90. mín. Leik lokið Leik lokið með 1:0-sigri Stjörnunnar í fjörugum leik sem hefði getað endað hvoru megin sem var.
Augnablik — sæki gögn...

• Blogga um frétt