Hrærir allt of mikið í liðinu

„Ég er virkilega ánægður með hugarfar leikmanna liðsins,“ sagði Kristján Guðmundsson, þjálfari Stjörnunnar, í samtali við mbl.is eftir 1:0-sigur liðsins gegn ÍBV í 12. umferð úrvalsdeildar kvenna í knattspyrnu, Pepsi Max-deildarinnar, á Samsung-vellinum í Garðabæ í dag.

Frétt af mbl.is

Glæsimark skildi liðin að í Garðabæ

„Við erum búin að vera nokkuð róleg yfir gengi síðustu leikja. Þetta var sjötti leikurinn okkar þar sem um jafntefli var að ræða eða annað hvort liðið vinnur með einu marki. Það var þess vegna stutt á milli í öllum þessum leikjum en þetta datt með okkur í dag og það kom aldrei til mála að við værum án sigurs í síðustu átta leikjum okkar.

Mér fannst við bæta okkur eftir því sem leið á leikinn í dag og við fórum inn á völlinn til þess að sækja sigurinn. Fyrri hálfleikurinn var ekkert sérstakur en við vorum mun betri í þeim síðari. Við nýttum okkur veikleika ÍBV-liðsins þegar þær komu ofarlega á völlinn og ég er virkilega sáttur með það hér í dag.“

Þetta var fyrsti sigurleikur Stjörnunnar síðan 24. júní en fyrir leik dagsins hafði Stjarnan aðeins fengið 2 stig af 21 mögulegu úr síðustu sjö deildarleikjum sínum.

„Það mætti ætla að við værum komin eitthvað lengra, ég er að hræra allt of mikið í liðinu. Ég er ekki alveg nægilega sáttur við heildina milli leikja en mér finnst þetta hafa verið stöðugra en í byrjun móts í undanförnum leikjum. Að þeim sökum höfum við ekki fengið á okkur jafn mikið af mörkum og í upphafi móts.“

Kristján vonast til þess að sigurinn komi liðinu á beinu brautina og hann sé nú nær því að finna rétta jafnvægið í liðinu.

„Ég er að leita að rétta jafnvæginu í liðinu en við erum með marga unga leikmenn sem eiga misjafna daga og það getur vel verið það sem er að trufla. Ég fæ of oft á tilfinninguna að ég sé ekki að finna rétta jafnvægið í liðinu.

Ég vonast til þess að Anna María Baldursdóttir komi inn í næstu leikjum en þetta snýst líka um að finna réttu blönduna og ég er enn að þreifa fyrir mér með það. Það spila ungir leikmenn sem hvíla svo og koma svo ferskir inn og ég er ennþá að fikta aðeins með það,“ bætti Kristján við í samtali við mbl.is.

• Blogga um frétt