Jón Dagur skaut AGF upp í annað sætið

Jón Dagur Þorsteinsson, fyrirliði 21-árs landsliðs Íslands í knattspyrnu, kom Árósaliðinu AGF upp í annað sæti dönsku úrvaldsdeildarinnar í kvöld.

Hann skoraði sigurmark liðsins gegn Lyngby, 1:0, á 50. mínútu leiksins og fyrir vikið er AGF komið upp fyrir meistarana í Midtjylland og í annað sætið með 28 stig. Midtjylland er með 27 og FC København 26 í þriðja og fjórða sæti.

Brøndby, lið Hjartar Hermannssonar, er hins vegar á toppnum með 30 stig og gæti náð fimm stiga forystu í kvöld þegar það tekur á móti AaB frá Álaborg.

Jón Dagur lék fyrstu 70 mínúturnar í leiknum í dag. Þetta er hans fimmta mark í deildinni á þessu keppnistímabili. Frederik Schram var varamarkvörður Lyngby í leiknum en hans lið er næstneðst í deildinni með 7 stig.

• Blogga um frétt