Íþróttir | Íslenski fótboltinn | mbl | 9.2.2021 | 14:56 | Uppfært 18:29

Íslandsmót kvenna hefst í Vestmannaeyjum

ÍBV og Þór/KA eiga að mætast í fyrsta leiknum á Íslandsmóti kvenna í vor. Ljósmynd/Þórir Tryggvason

Flautað verður til leiks á Íslandsmóti kvenna í knattspyrnu þriðjudaginn 4. maí, samkvæmt drögum að mótinu sem KSÍ birti í dag, og mótið hefst á Hásteinsvelli í Vestmannaeyjum að þessu sinni.

Þar tekur ÍBV á móti Þór/KA en síðar um kvöldið mætast Valur og Stjarnan á Hlíðarenda. Hinir þrír leikirnir í fyrstu umferð úrvalsdeildar kvenna, Pepsi Max-deildarinnar, fara fram miðvikudaginn 5. maí en þá eiga að mætast Tindastóll – Þróttur R., Keflavík – Selfoss og Breiðablik – Fylkir. Þar verður söguleg viðureign á Sauðárkróki þegar Tindastóll spilar í fyrsta skipti leik í efstu deild á Íslandsmóti meistaraflokks í knattspyrnu.

Samkvæmt drögunum verður lokaumferð deildarinnar leikin sunnudaginn 12. september en þá eiga að mætast Breiðablik – Þróttur R., Tindastóll – Stjarnan, ÍBV – Fylkir, Þór/KA – Keflavík og Valur – Selfoss.