Landsliðsmennirnir fá að fara til Þýskalands

Knattspyrnumenn sem leika í ensku úrvalsdeildinni mega ferðast til Þýskalands til að taka þátt í landsliðsverkefnum og því ljóst að alla vega þrír leikmenn íslenska landsliðsins geta tekið þátt í leik Íslands og Þýskalands í næstu viku.

Fyrr í dag sagði Arn­ar Þór Viðars­son, þjálf­ari ís­lenska karla­landsliðsins í knatt­spyrnu, að óvíst væri hvort þeir fjór­ir leik­menn landsliðsins sem spila á Bret­lands­eyj­um myndu fá inngöngu í Þýskaland vegna þeirra ströngu sótt­varn­a­reglna sem eru við lýði þar í landi.

Nú hefur þýska knattspyrnusambandið hins vegar sent frá sér tilkynningu og staðfest að leikmenn Þýskalands og Íslands sem spila í ensku úrvalsdeildinni mega ferðast til landsins og til borgarinnar Duisburg, þar sem leikurinn fer fram, án þess að fara í tíu daga sóttkví. Undanþágan snýr að því að leikmennirnir gangast undir vinnusóttkví og verða að skila neikvæðu kórónuveiruprófi sem má ekki vera eldra en 24 tíma gamalt.

Orðalagið í tilkynningunni er þó á þann hátt að undanþágan eigi aðeins við um leikmenn í úrvalsdeildinni. Þetta þýðir að þeir Gylfi Þór Sig­urðsson, Jó­hann Berg Guðmunds­son, Rún­ar Alex Rún­ars­son geta allir tekið þátt í leiknum. Jón Daði Böðvarsson spilar með enska liðinu Millwall í B-deildinni og því ekki alveg skýrt hvort undanþágan nær til hans einnig.

Sömuleiðis geta fjölmargir þýskir landsliðsmenn tekið þátt: Ilkay Gündog­an hjá Manchester City, auk þeirra Timo Werner, Ant­onio Rüdiger og Kai Havertz hjá Chel­sea, Bernd Leno hjá Arsenal og Robin Koch hjá Leeds United.

• Blogga um frétt