Ólafsvíkingar skoruðu átján - úrslitaleikur 1987 endurtekinn

Fyrsta umferð Mjólkurbikars karla í knattspyrnu hélt áfram með ellefu leikjum í dag. Víkingar frá Ólafsvík rótburstuðu Gullfálkann frá Reykjavík á Ólafsvíkurvelli, 18:0, og Framarar skoruðu átta mörk gegn Herði frá Ísafirði í Safamýrinni. Þá unnu Kórdrengir 1:0-sigur á Selfossi.

Tveir leikmenn skoruðu sex mörk hvor er Víkingar, sem spila í fyrstu deildinni, fóru illa með fjórðudeildarlið Gullfálkans sem lék sinn fyrsta opinbera leik og spilar í fyrsta skipti á Íslandsmótinu í sumar.

Englendingarnir Harley Willard og Kareem Isiaka skoruðu sex mörk hvor, Þorleifur Úlfarsson og Bjartur Bjarmi Barkarson voru hvor með sín tvö mörkin og Hlynur Sævar Jónsson skoraði eitt ásamt því að gestirnir gerðu sjálfsmark. Víkingar mæta Þrótti úr Reykjavík í annarri umferðinni en bæði lið spila í Lengjudeildinni.

Þá vann Fram öruggan 8:0-sigur á Herði frá Ísafirði á Framvellinum í Safamýrinni en um viðureign liða í fyrstu og fjórðu deild var að ræða. Tryggvi Snær Geirsson, Kyle McLagan og Aron Snær Ingason skoruðu tvö mörk hver fyrir Framara og þeir Magnús Þórðarson og Guðmundur Magnússon skoruðu eitt.

Framarar mæta Víði úr Garði í 2. umferð en þessu félög mættust einmitt í úrslitaleik bikarkeppninnar árið 1987. Þetta er í fyrsta sinn sem lið sem hafa mæst í úrslitaleik eigast við svona snemma í bikarkeppninni.

Kórdrengir unnu 1:0-sigur á Selfossi þar sem sigurmarkið var sjálfsmark en bæði lið eru nýliðar í Lengjudeildinni í ár. Kórdrengir mæta annaðhvort ÍBV eða Reyni úr Sandgerði í 2. umferð.

Frétt af mbl.is

Fyrstudeildarliðin ekki í vandræðum - varamaður með þrennu

Úrslitin í dag:

Höttur/Huginn - Einherji 7:1
Höttur/Huginn mætir  Leikni F.

Ýmir - KFR 1:2
KFR mætir Hamri eða Vestra

Berserkir - KFS (4:4) 5:6 - framlenging
KFS mætir Kríu

Kría - Afríka 13:1
Kría mætir KFS

Kormákur/Hvöt - Hamrarnir 2:3
Hamrarnir mæta Völsungi

SR - RB 1:0
SR mætir Aftureldingu eða Reyni Hellissandi

Fram - Hörður Í. 8:0
Fram mætir Víði

Víkingur Ó. - Gullfálkinn 18:0
Víkingur Ó. mætir Þrótti R.

Selfoss - Kórdrengir 0:1
Kórdrengir mæta ÍBV eða Reyni Sandgerði

Álafoss - GG 2:1
Álafoss mætir Njarðvík

Harley Willard skoraði sex mörk fyrir Víkinga frá Ólafsvík í dag. Ljósmynd/Alfons Finsson

• Blogga um frétt