Menn verða að læra fljótt

„Mér fannst þetta ekki nógu gott, við mætum ekki í fyrri hálfleikinn, veit ekki hvað ég get sagt meira,“  sagði Magnús Þór Magnússon fyrirliði Keflvíkinga eftir 4:2 tap fyrir Fylki í Árbænum í kvöld þegar leikið var í 5. umferð úrvalsdeildar Íslandsmótsins í knattspyrnu, Pepsi Max-deildinni.

Fyrirliðin fékkst þó til að segja aðeins meira. „Við komum sterkir inn í seinni hálfleikinn en fáum svo á stuttum tíma tvö mörk í andlitið.  Við erum að fá of mikið af mörkum á okkur, þetta er ekki flóknara en það.“ 

Nýliðarnir eru með nokkra unga leikmenn sem eiga eftir að fá reynslu af efstu deildinni.  „Við vitum að reynslan er ekki mikil, það er á hreinu en það eru nokkrir með reynslu en menn verða að læra fljótt og hef enga trú á öðru en menn læri fljótt.   Við unnum Stjörnuna og þurfum nú að snúa  bökum saman og standa saman, mæta dýrvitlausir við Val sem er eftir tvo daga,“ sagði fyrirliðinn. 

• Blogga um frétt