Stórt skref fram á við hjá okkur

Sindri Kristinn Ólafsson markvörður Keflvíkinga sagði að þrátt fyrir ósigur gegn Valsmönnum, 1:2, í Pepsi Max-deild karla í fótbolta í kvöld hefði verið margt jákvætt við leik liðsins gegn Íslandsmeisturunum.

„Ég vil meina að þetta hafi verið stórt skref fram á við hjá okkur. Við þurftum aðeins að núllstilla okkur eftir mjög dapran varnarleik í undanförnum leikjum og mér fannst við sýna í kvöld að við getum varist vel. Samt fengum við mörkin tvö á okkur upp úr föstum leikatriðum, og það þurfum við að skoða,“ sagði Sindri við mbl.is.

Frétt af mbl.is

Valsmenn með þriggja stiga forystu - sigur í 100. leiknum

„Í seinna markinu vorum við mjög óheppnir. Við reyndum að hreinsa eins og við gátum en það fór alltaf í Valsara. Vissulega skref fram á við en það er fúlt að tapa alltaf.“

Það hefur væntanlega verið aðeins komið á sálina hjá ykkur að fá á ykkur fjögur mörk í þremur leikjum í röð.

„Já, algjörlega, við þurftum að funda og við gerðum þrjár breytingar á byrjunarliðinu, og ég vil meina að þær hafi verið góðar, sérstaklega fyrir varnarleikinn. Við sköpuðum okkur kannski ekki hættuleg færi í þessum leik en við komum okkur í álitlegar stöður og vantaði oft bara herslumuninn.

Sindri Kristinn Ólafsson markvörður Keflvíkinga. mbl.is/Eggert Jóhannesson

En Valsmenn eru Íslandsmeistarar og ætla sér titilinn aftur og mér fannst ekki vera sá munur á liðunum í kvöld að annað væri á toppnum en hitt á botninum. Við sóttum hart að þeim á lokakaflanum en skoruðum of seint. Við hefðum þurft að ná markinu á 70. til 80. mínútu því við fengum ekki einu sinni aðra sókn eftir markið. En heilt yfir er ég ánægður, Joey skoraði í dag og það skiptir miklu máli. Þetta er fín frammistaða en við þurfum að skoða föstu leikatriðin. Við höfum fengið slík mörk á okkur undanfarin ár og þurfum að halda því áfram,“ sagði Sindri Kristinn Ólafsson.

• Blogga um frétt