Kári dregur sig úr hópnum - vill ekki smitast

Kári Árnason, miðvörðurinn reyndi í liði Víkings Reykjavíkur, hefur dregið sig úr íslenska landsliðshópnum sem á fyrir höndum þrjá vináttuleiki í lok mánaðarins og byrjun þess næsta.

Þetta fullyrti Guðmundur Benediktsson í Stúkunni á Stöð 2 Sport rétt í þessu, þegar síðari hálfleikur í viðureign Víkings og Fylkis var að hefjast í Pepsi Max-deildinni í knattspyrnu.

Kári er ekki meiddur enda er hann enn inni á vellinum með fyrirliðaband Víkinga.

Uppfært kl. 21.15

Kári staðfesti þessar fregnir í samtali við Stöð 2 Sport að leik loknum. Ástæðan fyrir því að hann dregur sig úr hópnum er sú að hann vill ekki taka áhættuna á að smitast af kórónuveirunni.

Kæmi til þess að hann myndi smitast í landsliðsverkefninu, þar sem ferðalög til Bandaríkjanna, Færeyja og Póllands bíða, sæi Kári fram á að vera frá út tímabilið, sem væri líklega hans síðasta á ferlinum.

• Blogga um frétt