Breiðablik í hópi ógnarsterkra liða

Kvennalið Breiðabliks í knattspyrnu er í öðrum styrkleikaflokki þegar dregið verður í riðlakeppni Meistaradeildar Evrópu næstkomandi mánudag. Í þeim styrkleikaflokki eru gífurlega sterk félög sem Breiðablik sleppur þar með við að mæta.

Í öðrum styrkleikaflokki eru nefnilega þrjú önnur lið sem eiga það öll sameiginlega að hafa unnið Meistaradeildina, samtals tíu titla.

Frétt af mbl.is

Þvílíkt stoltar af þessu magnaða afreki

Franska stórveldið Lyon, sem hefur unnið metfjölda Meistaradeildartitla, sjö talsins, er þeirra á meðal ásamt Wolfsburg, sem hefur unnið Meistaradeildina í tvígang.

Þá er ógetið Arsenal, sem vann Meistaradeildina árið 2006/2007. Þess má geta að þá slógu Skytturnar lið Breiðabliks úr keppni í átta liða úrslitum.

Eins og áður hefur verið greint frá hefur fyrirkomulagi Meistaradeildarinnar verið breytt fyrir þetta tímabil þar sem riðlakeppni kemur nú til skjalanna.

Áður hafði verið stuðst við útsláttarkeppni og hefur Breiðablik lengst komist í átta liða úrslit undir því fyrirkomulagi.

Frétt af mbl.is

„Alveg eins gott að fá besta liðið, Bayern München“

16 sterkustu lið Evrópu munu etja kappi í fjórum fjögurra liða riðlum og komust einungis liðin fjögur í efsta beint í riðlakeppnina. Styrkleikaflokkarnir fyrir dráttinn á mánudaginn eru eftirfarandi:

Styrkleikaflokkur 1:

Barcelona

París Saint-Germain

Bayern München

Chelsea

Styrkleikaflokkur 2:

Lyon

Wolfsburg

Arsenal

Breiðablik

Styrkleikaflokkur 3:

Häcken

Juventus

Hoffenheim

Real Madríd

Styrkleikaflokkur 4:

Zhytlobud Kharkiv

Servette

Köge

SL Benfica

Þessi röðun gefur Breiðabliki möguleika á að mæta þremur Íslendingaliðum því Glódís Perla Viggósdóttir og Karólína Lea Vilhjálmsdóttir leika með Bayern München sem er í fyrsta flokki, Diljá Ýr Zomers leikur með Häcken sem er í þriðja flokki og Cloé Eyja Lacasse leikur með SL Benfica sem er í fjórða flokki.

Frétt af mbl.is

Breiðablik í riðlakeppni Meistaradeildarinnar

• Blogga um frétt