Yfirlýsing Arons: Gagnrýnir KSÍ harðlega
Setja bókamerki
Aron Einar Gunnarsson, fyrirliði íslenska karlalandsliðsins í knattspyrnu, hefur sent frá sér harðorða yfirlýsingu eftir að hann var ekki valinn í landsliðshóp Íslands fyrir leikina gegn Armeníu og Liechtenstein í undankeppni HM.
Arnar Þór Viðarsson, þjálfari íslenskra karlalandsliðsins, tilkynnti landsliðshóp fyrir leikina gegn Armeníu og Liechtenstein í undankeppni HM á blaðamannafundi í höfuðstöðvum KSÍ í hádeginu í dag.
Flestir bjuggust við því að Aron Einar yrði í hópnum enda heill heilsu og verið fyrirliði íslenska karlalandsliðsins undanfarinn áratug.
Fyrir blaðamannafundinn í dag bárust fréttir af því að stjórn KSÍ hefði meinað Arnari Þór að velja landsliðsfyrirliðann en stjórnarmeðlimir, bæði fráfarandi og þeir sem munu taka við, hafa hafnað því í samtölum sínum við mbl.is. í dag.
Fréttin hefur verið uppfærð.
Yfirlýsing Arons Einars:
Eins og kom fram í fréttum í dag var ég ekki í hópi leikmanna sem Arnar Þór Viðarsson, þjálfari íslenska landsliðsins, valdi fyrir komandi landsleiki. Sú ákvörðun kemur í kjölfar þess að ég lýsti því yfir gagnvart KSÍ að ég gæfi kost á mér, væri í góðu formi og búinn að jafna mig að fullu af nýlegum veikindum. Að auki lýsti ég því yfir að ég hefði ekkert gert af mér og var þá að vísa í nýlega umræðu um meintan ofbeldiskúltúr innan KSÍ.
Á blaðamannafundi var hins vegar spurningum um ástæður valsins lítið svarað. Ég get aðeins dregið þá ályktun að komandi sjálfkjörin stjórn KSÍ hafi umboðslaus beitt sér fyrir því að mér yrði slaufað eins og fram hefur komið í fréttum á DV.is. Árangur landsliðsins hefur ekki verið þannig að skynsamlegt sé að setja reyndustu mennina til hliðar og því er það ekki ástæðan. Ég hef heldur ekki beðið Arnar Þór um trúnað um þær ástæður að hann velji mig ekki.
Fyrir mig, og fjölskyldu mína og vini sem þekkja til mín, er mjög sárt að KSÍ, sem ég hef í 97 landsleikjum gefið alla mína krafta skuli setja mig til hliðar vegna krafna sem byggjast á óljósum orðrómi um landsliðsmenn. Þetta er óverjandi staða.
Á samfélagsmiðlum hefur verið til umræðu atburður sem sagt er að hafi átt sér stað í Kaupmannahöfn 2010. Ég hef ekki fengið tækifæri til að ræða málið formlega við KSÍ, eða verið gefinn kostur á standa á rétti mínum gagnvart ávirðingunum, og því sárnar mér þessi fyrirvaralausa ákvörðun um að verða settur út úr liðinu. Í ofanálag hefur lögregla aldrei haft samband við mig vegna nokkurs máls. Ég hef engar tilkynningar fengið um að ég hafi á einhverjum tímapunkti verið undir grun og aldrei verið boðaður í yfirheyrslu.
Sem fyrirliði hef ég fyrir löngu lært að axla ábyrgð og það sem nú viðgengst er slaufunarmenning eða útilokunarmenning og hana ætti ekki að líða. Um leið og ég hafna öllu ofbeldi þá lýsi ég því yfir að ég hef aldrei gerst brotlegur gagnvart neinum eða neinni. Ég ætla mér ekki að vera meðvirkur gagnvart dómstól götunnar varðandi atvik sem á að hafa átt sér stað fyrir ellefu árum síðan. Hafi einhver eitthvað út á mig að setja þá bið ég viðkomandi vinsamlegast að hlífa mér ekki, ásaka mig frekar og nafngreina og gefa mér kost á að verja mig. Það er heiðarlegt.
Vegna þessa alls hef því ákveðið að óska eftir því við lögregluyfirvöld að fá að gefa skýrslu um þetta kvöld fyrir ellefu árum.
Aron Einar Gunnarsson
Komið „meira púður“ í viðræðurnar
Komu fólki til aðstoðar í Ísafjarðardjúpi
Munu áfrýja beint til Hæstaréttar
Telja sig geta rekið Grindavík til 2026
„Skjálftaklessa á milli Grímseyjar og Öxarfjarðar“
Jón „mun ekki koma nálægt meðferð hvalamálsins“
Slasað barn fær ekki styrk vegna leigu á hjólastól
