Stórsigur í jöfnum leik

Fjögurra marka sigur gegn liði sem er mjög svipað að styrkleika flokkast svo sannarlega undir frábær úrslit.

Íslenska kvennalandsliðið bókstaflega varð að vinna Tékka á Laugardalsvelli í gærkvöld til að lenda ekki í afar erfiðri stöðu í undankeppni heimsmeistaramótsins og gerði það með glæsibrag.

Vissulega gefa lokatölurnar 4:0 enga mynd af gangi leiksins sem gat hæglega sveiflast í hvora áttina sem var, allt þar til varamaðurinn Svava Rós Guðmundsdóttir skoraði hið mikilvæga þriðja mark tíu mínútum fyrir leikslok. Það var rothöggið á Tékkana sem áttu sextán marktilraunir gegn tólf hjá íslenska liðinu í leiknum.

Þessum frábæru úrslitum þarf íslenska liðið að fylgja eftir í seinni leiknum í Tékklandi 11. apríl. Vinni þær tékknesku sinn heimaleik verða þær áfram með undirtökin í baráttunni um annað sætið.

Greinin í heild sinni er í Morgunblaðinu í dag