Aron og Heiðar orðnir leikmenn Vals

Knattspyrnudeild Vals hefur gengið frá samningi við sóknarmanninn Aron Jóhannsson og bakvörðinn Heiðar Ægisson. Gera þeir báðir þriggja ára samning við Val, en þeir voru kynntir á blaðamannfundi í Fjósinu á Hlíðarenda í dag.

Aron er 31 árs framherji sem hefur leikið sem atvinnumaður erlendis frá árinu 2010. Hann lék síðast með Lech Poznan í Póllandi en hann hefur einnig leikið með Werder Bremen í Þýskalandi, Hammarby í Svíþjóð, AZ Alkmaar í Hollandi, AGF í Danmörku og Fjölni.

Aron lék með U21 árs landsliði Íslands en hann ákvað að lokum að leika með bandaríska A-landsliðinu. Þar lék hann 19 leiki og skoraði fjögur mörk. Aron hefur leikið 230 deildaleiki á ferlinum, í sex löndum, og skorað í þeim 82 mörk.

Heiðar er 26 ára hægri bakvörður sem hefur leikið með Stjörnunni allan sinn feril. Hann á að baki 128 úrvalsdeildarleiki fyrir Garðabæjarliðið og skoraði í þeim tvö mörk og er fjórði leikjahæsti leikmaður Stjörnunnar frá upphafi í deildinni.

• Blogga um frétt