Urðu Svartfjallalandi til skammar á Kópavogsvelli

Svartfellski fjölmiðilinn Vijesti fer ófögrum orðum um Buducnost-liðið sem mætti Breiðabliki í Sambandsdeild karla í fótbolta á Kópavogsvelli í gær. Breiðablik vann afar viðburðaríkan leik 2:0.

Frétt af mbl.is

Lögreglan skarst í leikinn á Kópavogsvelli

Buducnost lauk leik tveimur mönnum færri, ásamt því að þjálfarinn Aleksandar Nedovic fékk rautt spjald undir lokin. Eftir leik veittust leikmenn Buducnost svo að leikmönnum Breiðabliks, þar til lögregla skarst í leikinn.

„Dettandi, liggjandi, vælandi og að rífast....“ skrifar miðilinn um leikinn. Þar kemur einnig fram að framkoma í líkingu við þá sem leikmenn Buducnost buðu upp á í gær hafi ekki sést í lengri tíma. „Hegðunin var félaginu og Svartfjallalandi til skammar og annað eins hefur ekki sést í langan tíma.“

Þar kemur einnig fram að ekki sé um fyrsta skipti sem leikmenn Buducnost bjóði upp á slíka hegðun í Evrópuleik. Fyrir þremur árum fékk liðið tvö rauð spjöld gegn Zorya Luhansk frá Úkraínu og þá sýndu leikmenn liðsins einnig ógnandi hegðun.

„Þeir höguðu sér eins og villimenn í siðuðu landi, Íslandi. Guð má vita hvað Íslendingum finnst um okkur eftir þetta. Þið urðuð ykkur sjálfum, fótboltanum í Svartfjallalandi og landinu öllu til skammar,“ er einnig skrifað í umfjöllun um leikinn.

Þjálfarinn Aleksandar Nedovic ræddi við miðilinn eftir leik og kvartaði yfir heimadómgæslu í gær en viðurkenndi að leikmenn hafi ekki hjálpað dómaranum með hegðun sinni. „Við vorum eilítið stressaðir og liðið er ungt og óreynt,“ sagði hann.

• Blogga um frétt